Barak Obama FİFA-dan nə istəyir?

ABŞ prezidenti Barak Obama FİFA başçısı Yozef Blatterə məktub ünvanlayıb. Apasport.az saytının məlumatına görə, Obama ali futbol qurumunun rəhbərinə ABŞ-ın 2018 və ya 2022-ci ildə dünya çempionatının final mərhələsinə ev sahibliyi etmək istədiyi bildirib.

ABŞ prezidenti, həmçinin uşaq vaxtı İndoneziyanın Cakarta şəhərinin küçələrində futbol oynadığını da xatırladıb: “Mən balaca olanda, İndoneziyada şəhərin küçələrində futbol oynayırdıq. Bu, qonşu uşaqları birləşdirirdi. İndi mən atayam və qızımın da məşğul olduğu futbolun müsbət nəticəsini görürəm. Futbol həqiqətən dünya idmanıdır və planetin birinciliyi bütün yer kürəsinin təmsilçilərini birləşdirir”.

ABŞ Futbol Federasiyasının rəhbəri Sanil Qaleti bu məktuba münasibət bildirərək, ölkə prezidentinin dəstəyinin faydasını vurğulayıb: “Turnirin təşkilatçısı olmaq uğrunda mübarizədə prezidentin dəstəyi bizim xeyrimizə işləyəcək”.

Qeyd edək ki, ABŞ indiyədək bir dəfə - 1994-cü ildə dünya çempionatının final mərhələsini təşkil edib. Həmin çempionatda Braziliya yığması qalib gəlmişdi.