Martın 20-də Qoşa Qala qapısının qarşısında bayram şənliyi olacaq

Qoşa Qala qapısından başlayaraq Qız Qalasına qədər Azərbaycan mətbəxinin ləziz yeməkləri təqdim olunacaq

Novruz bayramıyla əlaqədar sabah səhərdən paytaxtda və ölkənin iri şəhər və rayonlarında bayram şənlikləri keçiriləcək. Bakıda saat 10:00-dan etibarən Qoşa Qala qapısının qarşısında bayram şənliyi başlanacaq. Konsert proqramında milli kollektiv və estrada ulduzları çıxış edəcək. İçərişəhərdə isə Qoşa Qala qapısından başlayaraq Qız Qalasına qədər Azərbaycan mətbəxinin ləziz yeməkləri təqdim olunacaq. Burada həmçinin el sənətkarlarının əl işləri nümayiş olunmaqla yanaşı, aşıqlar, muğam ustaları, meyxanaçıları, pəhləvanlar, kəndirbazlar, güləşçilər, rəqs kollektivləri çıxış edəcək.

Sabahdan polis də güclənidirilmiş rejimdə işləyəcək. Onlar martın 29-dək şənliklərin keçiriləcəyi yerlərdə və insanların kütləvi istirahət etdikləri ərazilərdə baş verə biləcək xoşagəlməz hadisələrin qarşısının alınması məqsədilə zəruri tədbirlər görəcəklər. Bundan başqa su, hava, dəmir yolu nəqliyyatında, avtovağzallarda, Bakı metropolitenində, xarici ölkələrin diplomatik nümayəndəliklərində və digər mühüm əhəmiyyətli obyektlərdə mühafizə gücləndiriləcək.

/ANS TV/