UEFA ermənilərə oyun satan klubu Avropa kuboklarından qovdu

UEFA Makedoniyanın “Pobeda” klubunu 8 il müddətinə Avropa kuboklarından kənarlaşdırıb.

Lent.az-ın məlumatına görə, buna “Pobeda”nın 2004-cü ildə keçirilmiş Çempionlar Liqasının ilkin təsnifat mərhələsinin qarşılaşmalarında Ermənistanın “Pünik” komandası ilə gizli anlaşmaya getməsi səbəb olub.

UEFA tərəfindən aparılan araşdırmalardan sonra Makedoniya təmsilçisinin rəqibə bilərəkdən uduzduğu müəyyənləşib. Klubun prezidenti Aleksandar Zabriçaneslə baş məşqçi Nikolçe Zdraveski isə ömürlük diskvalifikasiya ediliblər.

Qeyd edək ki, 2004-cü il iyulun 14-də keçirilmiş ilk görüşdə “Pobeda” “Pünik”ə öz meydançasında 1:3 hesabı ilə uduzub. Bir həftə sonra İrəvanda baş tutan qarşılaşma isə heç-heçə ilə nəticələnib – 1:1.