Bryus Uills özündən 22 yaş kiçik modellə evləndi+Video

Toyda aktyorun keçmiş həyat yoldaşı və 3 qızı da iştirak edib

Hollivud ulduzu Bryus Uills martın 22-də model Emma Heminqlə evlənib. Lent.az-ın “France Presse” agentliyinə istinadən verdiyi məlumata görə, bəyin 54, gəlinin isə 32 yaşı var.

Aktyorun nümayəndəsi bildirib ki, Karib hövzəsi adalarından birində keçirilən mərasimdə Bryus Uillsin keçmiş həyat yoldaşı, aktrisa Demi Mur, onların üç qızı, eləcə də Murun yeni həyat yoldaşı Eşton Katçer iştirak ediblər.

Qeyd edək ki, toy mərasimi barədə ilk dəfə martın 19-da məlumat verilib. Lakin Uillsin nümayəndələri bundan sonra da şərh verməkdən imtina ediblər. "Victorias Secret" alt paltarının reklamı kampaniyasından məşhur olan Emma Heminq isə ümumiyyətlə heç bir açıqlama vermir.

Bryus Uills və Demi Mur 1987-ci ildə evləniblər, 2000-ci ildə isə boşanıblar. Onların üç qızı var - 20 yaşlı Rumor, 17 yaşlı Skaut və 15 yaşlı Tallula Bell. Keçmiş həyat yoldaşları ayrılmalarına baxmayaraq dost münasibətlərini qoruyub saxlayıblar.